කලාප සංවිධායකවරුන් අතර පවතින සමගිය පක්ෂයේ අභිවෘද්ධියට මනා පිටිවහලක් වන බව එක්සත් ජාතික පක්ෂයේ මහලේකම් පාලිත රංගේ බණ්ඩාර මහතා ප්‍රකාශ කළේය.
මහලේකම්වරයා මේ බව පැවැසුවේ සිරිකොත පක්ෂ මූලස්ථානයේ පසුගියදා (02) පැවති එක්සත් ජාතික පක්ෂයේ කොළඹ දිස්ත්‍රික් සංවිධායකවරුන් වෙනුවෙන් පත්වීම් ලිපි ප්‍රදානය කිරීමේ උත්සවයට එක් වෙමිනි.
එහිදී වැඩිදුරටත් අදහස් දැක්වූ මහලේකම්වරයා මෙසේ ද පැවැසීය.
“කලාප සංවිධායකවරුන් අතර පවතින සමගිය පක්ෂයේ අභිවෘද්ධියට මනා පිටිවහලක්. ප්‍රශ්නවලට මැදිහත් වුවහොත් අපේ අරමුණ කරා යන්න බැරි වෙනවා. අපේ යන ගමන කඩාකප්පල් කරන අයගේ කුමන්ත්‍රණවලට අහුවෙන්න එපා. එවැනි දේවල්වලටත් මැදිහත් වෙන්න එපා. අද පත්වීම ගත් ඔබ මේ මාසයේ 12 වෙනිදාට පෙර කඩිනමින් මැතිවරණ මෙහෙයුම් කාර්යාලය ආරම්භ කළ යුතුයි. ඔබේ පත්වීම් ලිපිය සමඟ ලැබුණු ඇමුණුමට අනුව සඳහන් කර තිබෙන නිලධාරී මණ්ඩලය ද පත්කර ගත යුතුයි. ඡන්ද මධ්‍යස්ථානයට 25කට නොවැඩි කමිටුවක් පත්කර ගැනීමටත් තිබෙනවා. ඒ කමිටුව පත්කර කඩිනමින්ම සිරිකොත කාර්යාලයට වාර්තා කළ යුතුයි. කලාප සංවිධායක පත්වීම ගත් ඔබ ඒ කාර්යභාරය ඉටු නොකරන්නේ නම් ඔබව ඒ තනතුරෙන් ඉවත් කිරීමට කනගාටුවෙන් වුවත් සිදු වෙනවා.”
ජනාධිපති කාර්ය මණ්ඩල ප්‍රධානී, ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක සාගල රත්නායක මහතා
“ඉදිරිය මැතිවරණයකට සූදානම් වන මොහොතයි මේ. ඒ සඳහා කොළඹ දිස්ත්‍රික්කයේ එක්සත් ජාතික පක්ෂ වැඩපිළිවෙළ ශක්තිමත් කළ යුතුයි. අද කලාප සංවිධායක ධුර භාර ගන්නා ඔබ සැමට එය ඉතා කැපකිරීමෙන් කළ හැකියි. ආර්ථික අර්බුදය පැවති අවස්ථාවේ එක්සත් ජාතික පක්ෂ තනි මන්ත්‍රීවරයකුව සිටි රනිල් වික්‍රමසිංහ මහතා ජනාධිපති ධුරය භාරගෙන ඒ ආර්ථිකය අර්බුදයෙන් රට මුදාගැනීමට කටයුතු කළා. විදෙස් ණය ප්‍රතිව්‍යුහගතකරණය කිරීම සහ ණය ගෙවීමේ සහන කාලයක් ලබා ගැනීමෙන් රටට ආර්ථික සහනයක් දීමට කටයුතු කළා. වර්තමානයේ ආර්ථික තත්ත්වය සැලකිල්ලට ගෙන ජනතාවට සහන දීමට ජනාධිපතිවරයා කටයුතු කළා. ”
එක්සත් ජාතික පක්ෂ ජාතික ලේකම්, හිටපු ඇමැති රවී කරුණානායක මහතා
“නිර්පාක්ෂික ජනාධිපතිවරයෙක් ලෙස වර්තමාන ජනාධිපතිවරයා ජනාධිපතිවරණයට ඉදිරිපත් කරන්න තව දින සීයක් තියෙනවායි කියලා තමා අපි ගණන් හදලා තියෙන්නේ. කොළඹ දිස්ත්‍රික්කයෙන් අපි පෙරළියක් කර සෙසු පක්ෂත් එක්ක එකතු වෙලා ජනාධිපතිවරණයේදී ඔහුට විජයග්‍රහණයක් අත්පත් කර දෙන්න කටයුතු කළ යුතුයි. ජනාධිපතිවරණයට විපක්ෂයෙන් කවුරු ඉදිරිපත් වුණත් රට අර්බුදයකට ගිය වෙලාවේ ඒ අභියෝගයක භාර ගත්තේ වර්තමාන ජනාධිපතිවරයා පමණයි. අපට එදා ස්විච් එක දැම්මාම විදුලි බලය තිබුණේ නෑ. පවුලේ එක් කෙනෙක් ඉන්ධන පෝලිමේ අනිත් කෙනා ගෑස් පෝලිමේ හිටියා. පාසල් යන්න විදිහක් තිබුණේ නෑ. අවශ්‍ය ඖෂධ තිබුණේ නෑ. නමුත් ජනාධිපතිවරයා දේශපාලනය පැත්තකින් තියලා මේ රට ගොඩගත් නිසා අද රටේ දේශපාලනයත් උඩු යටිකුරු වෙලා තිබෙනවා.”
