බස් ගාස්තු සංශෝධනය ජාතික ප්‍රතිපත්තියට අනුකූලව කිරීමට කටයුතු කරන බව සමස්ත ලංකා පෞද්ගලික බස් හිමියන්ගේ සංගමය සඳහන් කරයි.
ඒ අනුව ඊයේ (30) මධ්‍යම රාත්‍රියේ සිට එම සංශෝධන ක්‍රියාත්මක කරන බව ‘දිනමිණ‘ සිදු කළ විමසීමකට පිළිතුරු දෙමින් එම සංගමයේ ලේකම් අංජන ප්‍රියංජිත් මහතා පැවසීය.
බස් ගාස්තු සියයට 5.27කින් අඩු කරන බවත් ඒ හේතුවෙන් රුපියල් 30ක් වන අවම බස් ගාස්තුව රුපියල් 28ක් වන බවත් හෙතෙම පැවසීය.
බස් ගාස්තු අඩුවීමේ වාසිය 100%ක්ම මගී ජනතාව ලබාගැනීමට නම් අනිවාර්යෙන්ම මාරු සල්ලි රැගෙන එන ලෙස මගී ජනතාවගෙන් ඉල්ලා සිටින ඒ මහතා සෑම ගාස්තු අවස්ථාවකදීම මේ රුපියල් දෙක, තුන, පහ වගේ මාරු කාසි ගැටලුව ඇති වීමට ඉඩ ඇති බව ද කියා සිටියේය.
‘ආණ්ඩුව පිළිගත්තා මින් ඉදිරියට, ඒ කියන්නේ ඊයේ (30) මධ්‍යම රාත්‍රියේ දී සිදුවෙනවා නම් ඩීසල් මිලෙහි අඩුවීමක් මේ අඩුවීම කිසිසේත් බස් ගාස්තු අඩුවීමකට බලපෑමක් සිද්ධ කරන්නේ නෑ කියන එකඟතාව මත මේ 5.27%ක බස් ගාස්තු අඩුවීමකට අපි එකඟ වන්නේ. අපි පැහැදිලිව කියනවා ආණ්ඩුව විසින් යම් යම් චක්‍රලේඛ ගෙනල්ලා මේ ප්‍රවාහන සේවාව අත්‍යවශ්‍ය සේවාවක් කර අපේ වෘත්තීය ක්‍රියාමාර්ග පස්සට හකුළන්න ආණ්ඩුව උත්සාහ කරනවානම් අපි එයට කිසිසේත් පසුබට වන්නේ නැහැ යැයිද හෙතෙම වැඩිදුරටත් කියා සිටියේය.
මේ සම්බන්ධයෙන් ජාතින ගමනාගමන කොමිෂන් සභාවෙන් කළ විමසුමකදී එම කොමිෂන් සභාව සඳහන් කරනු ලැබුවේ අද (01) දහවල් නව මිල සංශෝධනය සම්බන්ධයෙන් නිවේදනය නිකුත් කරන බවය.
