TEJC අඹ ප්‍රභේදය අපනයනය ඉලක්ක කරගත් වගාවන් වශයෙන් පමණක් මින් ඉදිරියට ව්‍යාප්ත කිරීමට කෘෂිකර්ම අමාත්‍යාංශය තීරණය කර තිබේ.
ශ්‍රී ලංකාවෙි මෙන්ම විදේශ වෙළෙඳපොළේ පවා ජනප්‍රිය අඹ ප්‍රභේදයක් වන ලාංකික නිෂ්පාදනයක් වන TEJC අඹ ප්‍රභේදය අසීමාන්තික ලෙස වගා කිරීම නිසා එම අඹවල ගුණාත්මකභාවය කෙරෙහි බලපෑම් එල්ලවෙමින් පවතින බවට හඳුනාගෙන ඇත.
TEJC අඹ ප්‍රභේදය සාමාන්‍ය වගාවක් වශයෙන් පවත්වාගෙන යාමත් එම අඹ පැළ විශාල වශයෙන් ගෘහස්ථ පරිභෝජනය සඳහා වගා කිරීම අඹ වගා කළ යුතු නිවැරදි ආකාරය ගොවීන්ගෙන් ගිලිහී යමින් තිබෙන බවද හඳුනාගෙන තිබේ.
එසේ වුවහොත් දැනට මෙම අඹ අපනයනය මගින් රටට ලැබෙන ඉහළ ආදායම අහිමි විය හැකි යැයි ද කෘෂිකර්ම හා වැවිලි කර්මාන්ත අමාත්‍ය මහින්ද අමරවීර මහතා පැවසීය.
TEJC අඹ ප්‍රභේදය වගා කර ඇති ඉඩම් ප්‍රමාණය කොපමණ දැයි වාර්තාවක් සකසන ලෙසත්, අවශ්‍යතාවය අනුව එම ඉඩම් ප්‍රමාණය ප්‍රමාණවත් වන්නේ නම් මින් ඉදිරියට TEJC අඹ ප්‍රභේදය වගා කිරීමේ දී වෙළෙඳපොළ අවශ්‍යතාවය සැලකිල්ලට ගනිමින් එම කටයුතු කරන්නැයි කෘෂිකර්ම අමාත්‍යවරයා නිලධාරීන්ට උපදෙස් දුන්නේය.
